रोटरी क्लब नारायणगावच्या अध्यक्षपदी स्वप्नील जुन्नरकर

रोटरी क्लब नारायणगावचा पदाधिकार स्वीकार समारंभ नियोजित प्रांतपाल चारूचंद्र श्रोत्री यांच्या प्रमुख उपस्थितीत संपन्न झाला.यावेळी रोटरी वर्ष २०२५-२६ च्या अध्यक्षपदाचा अधिकार स्वप्नील जुन्नरकर यांनी मावळते अध्यक्ष हेमंत महाजन यांचेकडून स्वीकारला.तसेच प्रशांत ब्रह्मे यांनी क्लबच्या सचिवपदाचा व नविन बोर्ड ऑफ डायरेक्टर्स यांनी पदभार स्वीकारला.या समारंभासाठी सन्माननीय अतिथी म्हणून मा.आमदार अतुल बेनके,ग्रामोन्नती मंडळाचे कार्याध्यक्ष कृषिरत्न अनिलतात्या मेहेर,विश्वस्त प्रकाशमामा पाटे, मोनिका मेहेर,सहकार्यवाह अरविंदभाऊ मेहेर,नारायणगावच्या सरपंच डॉ.शुभदा वाव्हळ,वारूळवाडी गावचे सरपंच विनायक भुजबळ,नारायणगावचे उपसरपंच योगेश उर्फ बाबू पाटे,माजी उपसरपंच संतोष वाजगे,संतोष दांगट,आशिष माळवदकर,नारायणगाव पोलीस स्टेशनचे सहाय्यक पोलिस निरीक्षक महादेव शेलार,उपप्रांतपाल धनंजय राजूरकर आदी मान्यवर,विविध रोटरी क्लबचे अध्यक्ष,आजी माजी पदाधिकारी,विविध क्षेत्रातील मान्यवर पदाधिकारी,ग्रामस्थ मोठ्या संख्येने उपस्थित होते.

सरत्या रोटरी वर्षातील प्रकल्प आणि कार्यक्रमांचा आढावा मावळते अध्यक्ष हेमंत महाजन यांनी घेतला.तसेच या वर्षातील महत्त्वाचे पुरस्कार प्रदान करण्यात आले.यामध्ये बेस्ट रोटेरिअन मंगेश मेहेर,बेस्ट रोटरी अॕन अमृता भिडे,बेस्ट रोटरी कपल अमित बेनके व धनश्री बेनके,बेस्ट प्रोजेक्ट डायरेक्टर प्रशांत ब्रह्मे,बेस्ट कम्युनिटी प्रोजेक्ट डायरेक्टर डॉ.योगेश पाटील यांना पुरस्कार देण्यात आले.वर्षातील महत्त्वाचा पुरस्कार व्होकेशनल एक्सलंस अॕवार्ड ग्रामोन्नती मंडळ नारायणगाव यांना प्रदान करण्यात आला.स्पेशल रिकग्निशन योगेश भिडे आणि सचिन घोडेकर यांना देण्यात येऊन सन्मानित करण्यात आले. 

पदाधिकार स्वीकारल्यानंतर अध्यक्ष स्वप्नील जुन्नरकर यांनी या वर्षातील नियोजित प्रकल्प आणि कार्यक्रमांचा आढावा सादर केला.तसेच या वर्षातील बोर्ड ऑफ डायरेक्टर्सची ओळख करून दिली. 

याप्रसंगी मनोगत व्यक्त करताना उपसरपंच योगेश उर्फ बाबू पाटे यांनी रोटरीच्या निरपेक्ष कार्याचा जगभर असलेला विस्तार सांगून रोटरीच्या कामाचे कौतुक केले व शुभेच्छा दिल्या.

ग्रामोन्नती मंडळाचे कार्याध्यक्ष कृषिरत्न अनिलतात्या मेहेर यांनी रोटरीची शिस्तबद्धता, नियोजनपूर्वक कार्यपध्दती आणि निरपेक्षता या गुणांचा आवर्जून उल्लेख केला. 

मा.आमदार अतुल बेनके यांनी शुभेच्छा देत असताना त्यांना स्वतःला रोटरिअन असण्याचा अभिमान वाटतो असे सांगितले.तसेच रोटरी क्लब नारायणगाव प्रत्येक वर्षी उत्कृष्ट प्रकल्प राबवून उत्तम कामगिरी करत असल्याचे नमूद केले.

कार्यक्रमाचे प्रमुख अतिथी चारूचंद्र श्रोत्री यांनी जगभरातील रोटरीचे काम हे सेवाभावी वृत्तीने होते तसेच प्रत्येक क्लब सेवा हे कर्तव्य मानून काम करतो.रोटरी क्लब नारायणगाव हा पंचक्रोशीतील सर्वात जुना आणि सातत्याने कार्यरत राहणारा क्लब असून स्वप्नील जुन्नरकर अध्यक्ष म्हणून या उज्वल परंपरेत मोलाची भर घालतील अशी अपेक्षा व्यक्त करून शुभेच्छा दिल्या.

कार्यक्रमाचे सूत्रसंचलन सचिन घोडेकर व अमृता भिडे यांनी केले.तर आभार प्रसाद बांगर यांनी मानले.पदाधिकार स्वीकार समारंभ यशस्वी करण्यासाठी डॉ.सविता भोसले,मंगेश मेहेर आणि ज्ञानेश्वर लोखंडे यांनी विशेष परिश्रम घेतले.